Sálmeðferð miðar að því að bera kennsl á hvar þú er tilbúinn og fær um að breytast og finna út hvað hægt er að gera til að stuðla að breytingum. Það gætu verið lítil og varfærnisleg skref sem þú þarft að taka en engu að síður mikilvæg skref í áttina þangað sem þú vilt komast. Varanlegar breytingar gerast yfirleitt smátt og smátt, sjaldan í stórum stökkum.

Það geta verið sársaukafullar upplifanir snemma á lífsleiðinni sem mótuðu varnarmunstur  sem í dag eru að valda okkur sárauka og vandræðum og einnig áföll síðar á lífsleiðinni sem hefta okkur í að njóta hæfileikanna sem við búum yfir og lifa lífinu til fulls. Sálmeðferð á að hjálpa okkur að skilja og afkóða þessi ómeðvituðu varnarmunstur og sýna okkur fram á fleiri valkosti í lífinu.

Það sem við getum gert er að reyna að átta okkur á hvaða hluta af okkur sjálfum gagnrýnisraddirnar innra með okkur eru að verja, fikra okkur síðan áfram og skoða hvort aðrir möguleikar séu í stöðunni, og hægt og bítandi sýna sér samkennd og mildi í hverju skrefi. Það að beita sig hörku og dæma sjálfa sig, gerir ekki neinum gott.

,,Endurtekin reynsla geymist í líkamanum og verður að staðreynd. “  Gáfaða dýrið,  Sæunn Kjartansdóttir.

Líkamsmiðuð sálmeðferð leggur áherslu á tengslin milli tilfinninga, hugar og líkama. Líkaminn geymir allt og tjáir allt á einhvern hátt. Hann geymir visku genginna kynslóða og færir okkur nær líðandi stund, að því sem er að gerast hér og nú. Það er út frá raunveruleikanum sem batinn og breytingarnar eiga sér stað.

Af hverju sálmeðferð? Lífið ber óhjákvæmilega með sér breytingar og allskonar álag sem getur verið erfitt að aðlagast og vinna úr. Sálmeðferð auðveldar jákvæðar breytingar hjá þeim sem leita að betri tilfinningalegri og félagslegri virkni.

Sálmeðferð er mislöng, eftir því hvert markmiðið hennar er. Áður en meðferð hefst er gott að setja sér markmið um það hvað það er sem maður vill fá út úr meðferðinni.

Það þarf hugrekki að ákveða að fara í sálmeðferð. Það getur verið kvíðavaldandi að finna sér góðan og heppilegan meðferðaraðila, sérstaklega ef þú ert að ganga í gegnum krefjandi tíma og sársaukafullar tilfinningar og upplifanir.

Kannski er ástæðan fyrir því að þú leitar að sálmeðferðarfræðingi að þig þyrstir í að eiga samtal og vinna með sjálfa þig þannig að þú öðlist meiri þroska og sjálfsskiilning, af því þú vilt vaxa sem manneskja!

Þú hefur val. Það er mikilvægt að vera meðvituð um að við stöndum alltaf frammi fyrir valkostum. Í sálmeðferð skoðum við hvaða valkostir blasa við í lífi þínu í dag.

Hvað viltu?           

Hvað skiptir þig mestu máli? 

Hvað stoppar þig?       

Hverju ertu tilbúin að fórna til að öðlast það sem þú vilt í raun og veru? 

Bráða- og ráðgjafarþjónusta geðsviðs

AA samtökin á Íslandi