Sálmeðferð styður þig í átt að sjálfskilningi og sátt, í að tengjast bjargráðum þínum og styrkleikum og sjá hvað hægt er að gera til að stuðla að jákvæðum breytingum. Varanlegar breytingar gerast yfirleitt smátt og smátt, sjaldan í stórum stökkum.
Það geta verið sársaukafullar upplifanir snemma á lífsleiðinni sem mótuðu varnarmunstur sem í dag eru að valda sárauka og vandræðum eða áföll síðar á lífsleiðinni sem hamla þig í að njóta þeirra hæfileika sem þú býrð yfir og lifa lífinu til fulls. Sálmeðferð á að hjálpa þér að skilja og afkóða ómeðvituðu varnarmunstur og sýna þér fram á fleiri valkosti í lífinu.
Það sem við getum gert er að reyna að átta okkur á hvað gagnrýnisraddirnar innra með okkur eru að verja og fikra okkur síðan áfram og skoða hvort aðrir möguleikar séu í stöðunni. Hægt og bítandi, sýna sjálfum sér samkennd og mildi í hverju skrefi. Það að beita sig hörku og dæma sjálfa sig hefur öfug áhrif, gerir ekki neinum gott.
,,Endurtekin reynsla geymist í líkamanum og verður að staðreynd.“ Gáfaða dýrið – Sæunn Kjartansdóttir.
Líkamsmiðuð sálmeðferð leggur áherslu á tengslin milli tilfinninga, hugar og líkama. Líkaminn geymir allt og tjáir allt á einhvern hátt. Hann geymir visku genginna kynslóða og færir okkur til líðandi stundar, hér og nú.
Af hverju sálmeðferð? Lífið ber óhjákvæmilega með sér breytingar, áföll og allskonar álag sem getur verið strembið að aðlagast og vinna úr. Sálmeðferð auðveldar úrvinnslu og jákvæðar breytingar hjá þeim sem leita að betri tilfinningalegri og félagslegri virkni.
Sálmeðferð er mislöng, eftir því hvert markmiðið hennar er. Áður en meðferð hefst er gott að setja sér markmið um það hvað það er sem maður vill fá út úr meðferðinni.
Það þarf hugrekki að ákveða að fara í sálmeðferð. Það getur verið kvíðavaldandi að finna sér góðan og heppilegan meðferðaraðila, sérstaklega ef þú ert að ganga í gegnum krefjandi tíma og sársaukafullar tilfinningar og upplifanir.
Kannski er ástæðan fyrir því að þú leitar að sálmeðferðarfræðingi að þig þyrstir í að eiga samtal og vinna með sjálfa þig þannig að þú öðlist meiri þroska og sjálfsskiilning, af því þú vilt vaxa sem manneskja!
Þú hefur val. Það er mikilvægt að vera meðvituð um að við stöndum alltaf frammi fyrir valkostum. Í sálmeðferð skoðum við hvaða valkostir blasa við í lífi þínu í dag.
Hvað viltu?
Hvað skiptir þig mestu máli?
Hvað stoppar þig?
Hverju ertu tilbúin að fórna til að öðlast það sem þú vilt í raun og veru?
Bráða- og ráðgjafarþjónusta geðsviðs
AA samtökin á Íslandi
UM LILJU STEINGRÍMSDÓTTUR
Ég heiti Lilja Steingrímsdóttir og starfa sem Bodynamic sálmeðferðarfræðingur. Ég býð þér uppá öruggt og þægilegt rými fyrir samtal og sállíkamlega vinnu. Mitt hlutverk er að styðja við þig í þeirri vinnu sem þú treystir þér í og sýna þér leiðir sem geta gagnast þér og aukið færni þína og sjálfskilning.